مواطنون يخاطبون وزير التجارة: منشوراتك مستفزة والناس جاعت وصارت يائسة وبائسة وفقيرة

بعد أن نشر وزير التجارة الداخلية وحماية المستهلك عمرو سالم، أمس صورا من جولته على الأسواق لرصد تحضيرات الناس للعيد، والتي قال أنه رأى عيون الناس يملؤها الفرح، ظهر استياء كبير لدى المواطنين المعلقين الذين استغربوا هذا الكلام.

و لاقى منشور الوزير سالم، سيلا من الانتقادات والتعليقات الغاضبة، ونستعرض هنا أبرزها:

🔷اي اكيد بدنا ننزل ع السوق نتفرج لانو ما قدرتنا بقا نشتري، انت وين عايش بس فهمني.

🔷سيادة الوزير: خذ راتب موظف درجة اولى مسقف… وانزل للسوق ونفذ لنا بيان عملي… عن الفرحة في العيون!!!

🔷دكتور لازم يكون المواطن عم بموت لحتى تقتنعوا أننا يائسون؟؟
اليأس والبؤس والفقر أكلنا
أطفالنا صاروا لحالن ما يتجرؤوا يطلبوا شي للعيد ولحالن بيقولوا مامعنا مصاري
كبار السن والعجزة عم يموتوا من أي كريب لان ماعندهم مناعة لشي بسبب سوء التغذية
المواطن الفلاح كل السنة بيسهر بالبرد ليدفي مزروعاته كرمال شهرين الموسم بالصيف وبيتأمل بالخير والعوض كون الأسعار مرتفعة بيتفاجأ مع بداية الموسم بالاستيراد !!!
صار حتى اللي بيوصلو حوالة من برا مابتكفيه إذا كيلو البرغل ٧٠٠٠ ليرة مو حرام؟
الناس طفشانة معاليك مو بس يائسة
بالاعلام عملنا برنامج خدمات بالاخير بطلو المسؤولين يردوا علينا وحظروا ارقامنا مو لان بيكرهونا لا بس لان ماعندن حلول تنطرح.

🔷نعم وقد عمت الفرحة قلوبنا وسعدنا كثيرا كثيرا واشترينا اللوز والبندق والكاجو والماجو والمكسرات والبقلاوة والحلوى والمن والسلوى ثم تناولنا البوظة وثم تنقشرنا بصحن نابلسية بعد ما خبطنا نصف كيلو من الكباب وسندويشتين من الشاورما وثم تجولنا بين المحلات واشترينا ثياب العيد وكسينا اولادنا من البابوج للطربوش وهذا والفرحة مازالت تعم قلوبنا والبسمة مافارقت وجنتينا وقهقهتنا خرقت الاوزون وتفرجنا ومشينا والفرحة مازالت تغمرنا وهيك هيك هيك حتى قلبت عن السرير وصحيت.

🔷مع احترامي لحضرتك ولفرحتك بالسوق وعجقته ، هي عجقة وهمية يعني لا بيع ولا شراء الا اذا بدك تقنعنا انو السوق أسعارو رخيصة والمواطن عايش مرفه وهاد تضليل للقيادة بادرجة الاولى.
مثلا ما بقدر روح صور بالفور سيزن وتدمع عيوني فرحا لسعادة المواطنين.
ارجو ان يكون كلامي خفيف عليكم.

🔷سيادتك عم تحكي عن جد!!!!
والله كل الفقر والمآسي اللي عم تمر على الشعب السوري بكوم…وتصريحاتك وبوستاتك بكوم تاني.
بحس بالوجع والألم والتعتر عنك وعليك ومنك وأصبحت اشك انه سيادتك اللي عم تصرح.مو مقول ابدا !!!!!!!!!

🔷ليس المطلوب أن تحترم عقول البشر- لكن عالقليلة إرحمها قليلا”- يعني أنت متضحك عمين ؟؟!!!

🔷سيادة الوزير بحب خبرك أنو الشعب العظيم ياااائس وبااائس وقرفااان كمان …. بس للأمانة هالموضوع الإنشائي عن فرحة العيد لابأس به😏

🔷عنجد الفرحة تعم الوجوه
معقول ماحدا شاف القهر بعيون العالم. والفقر اللي نهش العالم
بحسد سيادتكم على النظر الثاقب ياريت فيني شوف متل ماانتو بتشوفو
انتبه سيادتك ماحدا شايل كيس ومشتري كلن مخنوقين و رايحين يتفرجو
اصلا ومبهورين.

🔷أود أن أعلمك سيادة الوزير ان تصوير المواطنين دون رضاهم يدخل في حيز الجريمة الالكترونية…فهل اخذت الموافة

🔷في برنامج اسمه فطورك علينا عم تقدمه جريدة الوطن يا ريت يا سيادة الوزير اتابعو رح يعطيك فكرة عن السوق والأسعار والفرحة بعيون الناس ع الحقيقة.

🔷كلامك صحيح وانا شخصياً نزلت عالسوق من كتر ما مبسوطة بالأسعار كفرت ورجعت…
روح نام.

🔷السيد الوزير المحترم :
نحن الشعب السوري الخلوق الذي لاتزول اخلاقه ولو زالت الدنيا .
لانستخدم اسلوبك بالرد الذي عهدناه بالرد على غسان جديد وسواه عندما كانوا يخالفونك الرأي…وسنقول عن كلامك انه مغلوط او غير صحيح
هذا التغني الذي تشدو به لست اهلا له فنحن من يعاني الامرين وكذالك نحن من يدفع ضريبة سوء قراراتك …هذا المواطن الذي تتغنى بصموده يعمل ثلاتة دوامات واهله بيته كلهم يعملون حتى يحصلون على قوت يومهم ومعظمهم لا يملكون ربع كيلو سكر في بيوتهم ويغسلون قطعة ثيابهم ينتظرون نشفانها حتى يعاودوا لبسها
ومعظمهم يشترون ربطتي خبز حتى يغطونا
نقص وزن مخصصاتهم مما تعطون
عن ماذا تريد يا سيادة الوزير ان احدثك
زالت النعم وزادت النقم وعلى قبور الفقراء تتراقص ويزيد شدوك وتغنيك.

🔷انا مستغربة جدا كيف منزل هالصور .. سيادة الوزير هالبوست بسيء جدا لحضرتك وللمواطن ومستفز لابعد درجة… والهوة يلي بينكم وبين الحالة المعيشية أكبر بكتير مما تتخيل ويلي بشوف هالصور ” مغناطيس الشتائم ” يقول هذا مقصود حتى الناس تفقد اعصابها وتكتب ؟!!!!

🔷سؤال جدي جدا … انت ما بتشوف هيك بوست من حدا بمنصبك بوست استفزازي لدرجة كبيرة … يارجل ما معنا مصاري مامعنا مصاري اسا بقلي الفرحة في أعينهم.

🔷مو ناقص غير تقول الناس بعدها عايشة بفضلكم!

🔷مع كل الاحترام والتقدير لسيادتك أسألك:
ألا تخجل من منشورك؟ اين تعيش؟

🔷و الناس اللي عم تموت ببيوتها و عينها مكسورة قدام ولادها لان مو بإستطاعتها تجبلهن اواعي للعيد متل باقي الناس شو وضعهن هدول
في رجال قلوبها عم تبكي من العجز اللي وصلولو و مو كل الناس عم تتسوق من كيفها في ناس عم تحط ع قلبها ديون لتفرح اطفالها
لك انو شام و انو وطن اذا كرامة الانسان بهالوطن نزالت شو ضللو كرامة و قيمة البني ادم ببلد تسمى بلدو.

🔷بوستات مستفزة و كأنك عم تجاكر الناس مجاكرة

🔷هلق هاد الاستفزاز مقصود أو لأ.. معلش بس توضحلنا سألت عن الأسعار أو بس شفت الفرحة في أعينهم و سلامهم الدافئ المحب!!!

🔷نيالك معالي الوزير بجولة وحدة عالسوق لقيت الفرح بعيون الشعب… نحن كشعب النا سنين عمندور عهالفرحة بعيون بعض ما عمنلاقيها ……. هنيئا لكم ما رأيتم.

🔷ما شفنا ولا ضحكة بالوجوه يلي مصورها معاليك بالعكس كله مكفهر بما فيهن صاحب المحل معاش الموظف ما بيجيب بنطلون وبلوزة لولد واحد بس نحنا شعب منرش ملح عالجرح ومنكبسه المهم تزول الدنيا قبل ان تزول الشام
ما كتبته معاليك ينفع ان يكون موضوع تعبير ليس إلا

🔷هيك شايف؟ لاتواخذني منيح ماكنت عمتصور ب الفور سيزن..ولا ع شواطئ البحر…لسا بيشترو الفروج ب30الف مكيفين وكلو من الراتب ياسيادة الوزير ..ووالاحسن راكبين سيارات سعرها فوق العشرين مليون…شوف البذخ يارعاك الله..وتصور بيطالبو بإرجاع الدعم…اوف شو طماعين.

طريقك الصحيح نحو الحقيقة