صباحك تفاؤل من دمشق

خاص شبكة غلوبال الإعلامية

عزيزي المواطن، صباحك تفاؤل من ربوع العاصمة دمشق، أنت لست بخير، بسبب الوضع الذي أدخلك في دوّامة لا خروج منها، تشكو من أزمات خانقة في كلّ شي، بنزين، غاز ، كهربا ء، أسعار خيالية، طمع تجار، حتى الخبز بات الحصول عليه همّا بالنسبة لك، أنت تشكو من القرارات الحكومية المتخبّطة التي زادت من حدّة أزماتك التي تعيشها، كلّ هذا أنت تعانيه في مطلع كلّ نهار، تعمل ليل نهار، نسيت كل الرفاهيات، باتت أقصى أمانيك أن تطعم أطفالك حتى يشبعوا، إن حظيت بهذا الحق الذي من المفروض أنّه محمي، تشكو من تخبّط القرارات الحكومية التي زادت من حدّة إرهاقك، كلّ هذا أنت تعيشه، هنا دعني أسرد لك سردة المتفائلين!

ولنخرج عن المألوف ونتوقف هون عن السرد لأخبار أزماتك، ومشان ما تزعل مننا لانو كل اخبارنا هم وغم، بس نحنا بدنا نخبرك شو عم بصير بس، فما تزعل مننا، وسمع كيف رح نخليك رواق اليوم.

ليش كل هالتعب، صار همك تجيب الخبز المفروض أنو كان أسهل شي وصار أصعب شي، لا تزعل ولا تتدايق، ألا تعلم أنّ وزارة التجارة خفّضت مخصصات الخبز دون أن تعلم بذلك، لكنّها فعلت ذلك لصالحك، توّقف عن تبحترك بالخبز، هذا القرار سيوقف الهدر والفساد بالأفران، وسيؤمن لقمة عيشك برسالة وأنت جالس تتصفح الفيس بوك، أنت تشكو دون أن تعلم أن هذه رفاهيه، يجب أن تبتسم لذلك، فأنت الهم الأول والأخير بأي قرار حكومي!

من 3 شهور ما استلمت جرّة غاز، أنت مستاء، لا، لماذا، الغاز متوفر والتوريدات وصلت وهي آمنة بعقود ثابتة، ألا تعلم أن السبب بتأخر وصول الرسائل هو الضغط على الشبكة، لما لا تقدّر ظروف شركة تكامل فهي معنية بإرسال الرسائل لـ 17 مليون سوري، فكّر بهذا، الرسالة في طريقها إليك، تفاءل، فربّما ستصلك وأنت تتصفح مقالنا، ادع لنا عندما تصلك!

بنزين، ما عم يكفيك، ما فيك عم تأمنوا، طب أنت كمان مو عم تشكي من الغلا والوضع، ليش تمشي سيّارتك، الوضع صعب، والبلد بأزمة، قدّر طيب الظرف، لو سمحت، بكرا شوف الأيام الجاي أحسن، والبنزين رح يصير بالهبل موّفر، وكمان المازوت آكل هم الشتوية، خلص اطّمن كمان صار برسالة، معقول ماتصلك من هون لشهرين تلاتة، لا أكيد بكرا جاي حكومة جديدة، بإذن الله، مارح تشعر بالبردات، وولادك رح يناموا دفيانين، فما في داعي كتير تضل مدايق، بكرا أحلى، مو هيك بقلولنا بالأخبار كل يوم الصبح!

مافي كهربا، وبالتالي مافي مي، كما أنت وفّر، السنة مانزلو مطرات كتير، صح وزارة الموارد طمّنتا أن نشالله مافي أزمة، وهوي هيك مافي، المشكلة بالكهربا، وعدونا رح تتحسّن، وما كتير تزعل، هلّق ضغط عالصيف، بسبب المكيّفات والمرواح، بتعرف هالقصص، كلن كم يوم بيخلص الصيف، بتجي الشتوية، وساعتا شوف كيف رح تتبحتر بالمي، وتتذكّرنا بوقتا أكيد، وعفكرة رح تصير تجي المي بلا شفاطات، فلا تعذّب حالك، وتروح تدّين لتشتري شفاط، وكمان دير بالك، هلق الكهربا ماعم تجي والحديث كلو عن الطاقة الشمسية، هلّق اذا معك تشتريا منيح، بس إذا مامعك، بلاها بكرا شوف الكهربا كم يوم وبتتحسّن أكيد، فما ترهق حالك بعبء جديد!

وكيف ما بدك تتفاءل، و يمكن صار بالبلد في سيارات كهربا، وبتقلي ما في كهربا، طب اذا مافيه هي كيف رح تشتغل ويبيعوا، شفت، همّك مو بمحلو، عنّا كهربا كتير ماتخاف، وعم نصدّر للبنان كمان، شفت كيف، ومو بس هيك، لتعرف قديش الوضع تمام، عم بصير كل شي الكتروني، يعني ماعد رح تتعذّب بشي، بيصلك كلّو لعندك، انت بس اشتغل وجيب مصاري وما عليك، كلو بيجي لعندك، لأنك بتستاهل تكون مروق ومرتاح.

مو بس هيك، نسيت قلك، ماعد تاكل همّ كيف بدّك توصل عدوامك، حزر شو صار عنّا، مبارح طمنونا، خلص، الحكومة أصدرت تعليمات التطبيق الإلكتروني لنقل الركاب، أنت ما عليك غير بس تجيب مصاري منيح، تشترك بالتطبيق، وبتدخّل كل بياناتك، وهيك رح يكون فيك تطلب سيارة بتاخدك وينا مابدّك، فخلص الأمور منيحة وتمام، وكلو محلول.

أكيد هلّق عم تبتسم، شفت شلون، كلو بالابتسامة بينحل، لك أصلا نحنا الشعب السوري مابيلبقلنا غير نفرح، شوف عشر سنين حرب، ونحنا قوايا، وما بتشوف كيف عالفيس صرنا ناخد كل شي بنكته، أصلا هيك الحياة بدا، اضحك تضحك لك الحياة، وكلو محلول بإذن الله.

صباحك ابتسامة ورواق نشالله عطول، وأهم شي جميل متل قلبك الطيب والصافي، وعلى شودخلك، مفكر اذا زعلت وتدايقت رح يتغير شي، كلو ماشي صدقني، اذازعلت او رضيت، عالقليلة اذا ضحكت بتهوّن عحالك شوية ضغط، ناقصك انت فوق همك هم.

من شبكة غلوبال الإعلامية، و من قلب العاصمة دمشق، بندعيك لتبتسم وبس، تمام، صباحك أمل ببكرا أحلى ألك ولولادك، والنا الله لوحدو امل بكل شي حلو، وهو الميسر والمدبّر!

يسعد صباحكم

طريقك الصحيح نحو الحقيقة